So Ching做嘉賓煮暗黑料理再現笑容 首談走過低潮靠「時間沖淡一切」

前年7月MIRROR紅館演唱會發生大屏幕墮下事故，舞蹈員阿Mo身受重傷。阿Mo女友So Ching（蘇芷晴）一直陪伴照顧，去年更宣布退出女團COLLAR。回復自由身後，So Ching專注於教跳舞，並開設Youtube Channel拍片分享生活。

youtube頻道「膠保廢」尋日上載新片，搵到So Ching同2位主持一齊整暗黑料理，就係將甜品蘋果金寶變成意粉！煮食過程當中3個人超多甩漏，打蛋打到周圍都係，So Ching似乎十分投入其中。而試食成品嗰陣大家都面有難色，So Ching更直言個意粉「好＿甜」！

之後喺傾計環節，So Ching透露近排主要跳舞同拍YOUTUBE片兩邊發展，教跳舞之餘仲準備緊參加美國綜藝節目World of Dance嘅比賽。

主持阿保問到So Ching點由「2年前一件大事」走到而家？So Ching就話時間沖淡一切。「以前唔會信架……但基於呢件事都覺得幾套到落去」。提到事發後不時有網民對佢負評，So Ching話網民負評從來唔睇，亦唔會開通知，即使佢想自己穩定一啲，但有時總會遇到觸動情緒嘅留言。不過So Ching認為大部份影響唔到佢，因為焦點唔同咗，佢覺得搵到自己要行嘅路，知道自己追求嘅目標就得。

出事至今就快2年，So Ching都認同主持所講，「好似發咗場夢」，而且覺得以前好心急，去年中開始搵返生活節奏，慢慢知道點生活先比較好嘅，而家自己會慢落嚟。So Ching亦承認呢2年急速成長，直言以自己年紀唔可以再浪費時間，真係鍾意嘅事就要花時間令自己進步。

喺片尾NG片段，主持阿保進入認真mode問So Ching點由「2年前一件大事」走到而家時，So Ching竟然忍唔住笑，連阿保都話「冇諗過你笑」要飲茶定驚。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！