MIRROR呂爵安後援會新內閣再辭職 有成員承認隱瞞身份呃埋Edan

MIRROR呂爵安Edan嘅fans後援會再次出現紛爭，日前有fans爆料指，早前當選嘅後援會新管理團隊，疑似有成員係來自之前引起爭議嘅舊團隊，並且指控有人懷疑掩飾個人身份，堅稱同舊團隊冇關係，令其他會員投票時受到誤導。

而新管理團隊尋日喺Edan嘅fans通訊平台頻道上，宣布辭職。團隊喺聲明中交代，承認有後援會舊團隊成員參與，「決定組隊參選係因為當時距離生日同演唱會時間相當緊迫，一直都擔心新團隊進行交接同埋安排各種應援會好吃力，而我哋一直都好想可以再為爵安進行應援，所以選擇再試一次參選」。對於被指用其他帳戶隱瞞「舊人」身份，辭職團隊聲明中承認有咁做，「希望避免任何猜測或者偏見，所以最終選擇用其他TG Account參選」。

由於新團隊充斥舊人，令fans懷疑Edan以至其公司一早知道，但新團隊重申「上公司(Makerville）面試嘅時候都係以新參選人角色與公司見面並進行遴選。我哋在此澄清爵安、Yu(Makerville代表）及公司對於我哋嘅背景並不知情」，同時為此道歉。「我哋對於用其他TG Account參選，而冇向大家坦白深表歉意。再次重申及澄清事件發生前爵安、Yu及公司對於我哋嘅背景並不知情，希望大家唔好再作任何揣測」。

而Edan喺同fans溝通嘅群組中親自回應，對於被指佢以至其公司一早知道舊人再上場時，Edan話「我見到有啲人質疑公司同我係知情地去選fc，想特登用返舊嘅人，我真係呆_左，呆_埋右。其實我同啊yu真係冇咁得閒，點解要特登搞咁多嘢又選舉又盛，只係想可以好好地選一個大家心目中最適合嘅fc去聚集大家，如果你覺得我哋明知有問題有危險都走去揀，咁可能你真係低估咗我哋嘅智商，好可惜而家事與願違，我哋都諗緊方法去處理。」

Edan嘅後援會有收會費，前朝後援會去年10月解散，一度令人擔心金額高達七位數嘅會費何去何從。辭職團隊表示退款手續已經處理咗8成，預計短期內完成。

呂爵安嘅fans後援會去年先爆出內訌糾紛，有份管理fan club嘅團隊成員大爆黑幕，公開內部通話截圖，指團隊大有問題，唔單止動輒就叫其他爵屎（Edan fans嘅稱呼）做「白卡」，更疑似黑箱作業，設立黑名單阻止佢地唔喜歡嘅爵屎抽演唱會飛。由於負面新聞不斷，去年十月Edan嘅fans後援會宣布解散，並進行改組選舉，由各位fans自行組閣角逐。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！