CHILL CLUB︱kayan9896自爆想做「港版Taylor Swift」疑被主持人恥笑 網民反應兩極

現年25歲嘅kayan9896（吳家忻），早年憑YouTube頻道「試當真」成功彈起，不但成為廣告新寵兒，亦踩入樂壇做歌手，更將於本周舉行爵士音樂會。近日，kayan9896可以話係是非多多，繼被爆出與富三代馬桂烽（Justin）戀情及疑被「試當真」單方面飛起後，去到噚日（10日）嘅ViuTV音樂節目《CHILL CLUB》，大家有見到kayan9896，不過預告中大爆自己想做「港版Taylor Swift」嘅訪問，節目竟然冇播出！

ViuTV音樂節目《CHILL CLUB》每集都會邀請不同嘅嘉賓，噚晚播出嘅最新一集就邀請咗Moon Tang、Kiri T及kayan9896做嘉賓，唱出多首歌曲，冧爆全場觀眾。喺預告中，kayan9896表示自己想做「Hong Kong Taylor Swift」，而企喺旁邊嘅主持人Thor就唔爭氣咁笑咗，網民對阿Thor嘅反應兩極，有人認為佢憑啲咩嘢笑人，留言話：「係咪恥笑緊kayan9896？」、「牙Thor 憑乜嘢笑人」 及「其實個女仔講嘢嘢無問題，點解主持要咁樣笑人⋯⋯」等等；同時亦有網民認為Kayan9896不自量力，留言話「自己講出黎，咪比人笑，自封係搞笑喎 Taylor switft得一個，港版 你話自己偶像係佢咪算」、「牙Thor笑好正常姐 我聽到都笑啦 人哋國際天后喎 是但出首歌都billboard no.1」及「阿Thor 無做錯喎，係好笑丫嘛」等等。

不過喺節目播出前，預告已經由kayan9896講出自己志願，變成Kiri T.表示今年會出碟，而節目亦唔見有kayan9896講出自己志願嘅足本版。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！