Candy@Collar被網民翻查IG粉絲名單質疑買粉絲 有網民力撐無證據

COLLAR將於3月22日假九龍灣國際展貿中心Star Hall舉行一連3場演唱會，近日亦大曬加操體能備戰嘅照片，務求以最佳狀態演出。不過，COLLAR成員們於演唱會開騷前接二連三被爆緋聞，就連王家晴（Candy）亦出事，不過佢就唔係被爆戀情，而係被質疑買IG粉絲。

Candy擁有21.1萬名粉絲追蹤（截至20日凌晨12時），但近日有網民於討論區以「Collar Candy霉到要IG買粉」為題發文，貼出統計數據指控Candy買粉絲谷人氣，表示Candy早前生日直播僅得約400人觀看，對比去年生日1500人觀看，人氣明顯下跌，又指Candy即使連日分享小性感造型亦無助人氣。網民又提出，經過一星期後，Candy粉絲人數離奇地不跌反升，每日更以100個粉絲以上速度上升，喺短短13日內亦增加咗約700個粉絲，於是忍唔住撳入去睇吓追蹤Candy嘅粉絲究竟係乜人，發現新增嘅粉絲大部分為空殼和「殭屍帳號」，於是懷疑Candy買粉絲，惹起熱議。

網民紛紛留言：「一早unfollow咗，對fans零回應，已經揼晒佢d應援」、「成廿萬人都仲要買，係咪真係好驚跌返落19萬呀」、「明明係霉到買粉都冇人留意，你硬係要出post講」、「咁衰架踢爆人」、「IG有殭屍account follow，有買followers嫌疑咁樣好大罪㗎喎」等等。不過，都有唔少網民批評樓主，認為點解佢會咁得閒觀察人哋嘅IG粉絲：「係唔係誓要將collar逐一擊破？」、「點先肯放過人？」、「咁得閒好心你做返d有意義d既事啦」等等，又有網民幫口指可能係Candy粉絲幫佢買：「可能係佢d fans幫佢買？證實唔到係佢自己買喎」、「其實任何人都可以買」、「佢哋本人控制唔到嘅，邊個都可以買」等等，又有網民指自己IG都係一個Post都無。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！