90年代K歌天后梁雁翎 59歲白頭短髮look曝光 「不懼時光優雅老去」

90年代卡拉OK喺香港興起，當年製作唔少卡拉OK影碟嘅飛圖好賺到開埋唱片公司，仲買下電視台時段力谷歌曲MV，旗下「一姐」梁雁翎(Annie）因此廣為觀眾認識。後來梁雁翎退出樂壇並且神隱多時，但近排原來喺內地社交平台抖音開帳戶分享生活，早前Annie post咗張近照，一頭銀絲但剪成爽朗短髮造型，並寫道「不懼時光優雅老去」十分有型！

梁雁翎出道時香港玉女歌手多的是，於是Annie當年嘅造型都係長髮靚女look，但早前佢喺抖音拍條片講斷捨離，就將當年嘅玉女照喺鏡頭前撕爛，仲留言回覆叫佢唔好撕爛照嘅網友「回憶在記憶深處」，好瀟灑。除此之外，梁雁翎多數抖音內容都係出外旅遊、同朋友飯局等，似乎幾寫意。

梁雁翎曾於北京嘅音樂學院修讀歌劇系，後來來港生活，曾於工廠打工。梁1985年參加第一屆亞姐入行，並加入亞視做藝員，同時喺食肆為樂隊做公關，因此而結識商人葉志銘，亦即係葉玉卿嘅哥哥。葉志銘當時搞卡拉OK影碟生意，邀請梁雁翎夾份成立飛圖，起初梁主要打理業務，但因為當年卡拉OK生意大盛，唱片公司唔賣版權俾飛圖整KTV，於是學過唱歌嘅梁雁翎搖身一變成為公司旗下歌手。

1991年梁雁翎憑住喺電視日播夜播嘅《像霧像雨又像風》而成名，同名專輯銷量達到10萬張，叻過唔少新人。其後4年間梁雁翎出過8張唱片，並於1993年以香港代表身份出席央視春晚，幕前工作以外同時要打理飛圖業務，Annie居然仲可以搞自己生意，好犀利。

飛圖老闆葉志銘1994年宣布退休後，梁雁翎接手成為飛圖主席，但90年代中期翻版唱片猖獗，梁上任一年後都決定離職。輾轉之下，飛圖易手予楊受成，成為現時英皇娛樂嘅前身。至於梁雁翎就轉行，搞過婚紗生意又做過保險經紀，不時參加幕前工作，2017年喺香港開過個唱。

梁雁翎同葉志銘傳過緋聞，而梁就視對方為伯樂。1993年梁雁翎返北京準備春晚演出時約舊同學聚會，重遇高中時青梅竹馬嘅同學William。當年梁雁翎對William有感覺，但男方未有行動，於是Annie採取主動。交往年多之後，梁雁翎同William 1995年結婚，讀醫嘅William要出國留學，於是梁雁翎亦跟住老公，順勢退隱，而二人結婚多年未有子女。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！