【龍年開飯】2024賀年禮盒精選 Q版糖霜餅乾、雲朵棉花餅

拜年送禮係指定動作，大家睇啱邊款賀年禮盒呢？未有心水嘅話，以下嘅精選推介可能幫到你～

Q版龍年糖霜餅乾 FORTNUM & MASON

Fortnum & Mason推出多款賀年禮盒，其中「Lunar New Year Iced Biscuits」最特別：一盒5款Q版糖霜餅乾以中式元素同龍年為設計主題，包括燈籠、錦鯉、扇、浮雲同宏偉嘅龍頭，喜慶之餘相當應節。留意呢款只限於K11 MUSEA旗艦店發售。另外重有對應水晶而設計嘅4款禮盒，分別配以葉葉、餅乾、糖果等，送畀鍾意身心靈嘅朋友仔啱晒。

彩雲糖果寶盒、女王的棉花餅 Lady M

Lady M香港店首度推出全球獨家嘅The Queen’s Collection女王甜點系列「The Queen’s Dacquoise 女王的棉花餅」，重現源自十七世紀嘅經典法國皇室手作甜點。雲朵造型嘅棉花餅以日本特級杏仁粉製作，低溫烘烤後外層鬆脆，內層蓬鬆輕盈，而5款口味包括海鹽焦糖、開心果、藍莓、芒果百香果同士多啤梨。另外「龍舞彩雲糖果寶盒」內藏六款臻貴糖果同捲餅，以及5個精緻嘅龍年大吉搖搖利是封㖭。

迪士尼米奇與好友系列賀年套裝 奇華餅家

奇華由即日至2024年2月9日期間推出「迪士尼米奇與好友系列賀年套裝」禮遇，想米奇同一眾好友陪你慶祝新春佳節，可以考慮以下套裝：
1) 迪士尼米奇與好友賀年系列 套裝一（$514）：選購「迪士尼米奇與好友系列賀年糖果禮盒」一套六罐、「迪士尼米奇與好友系列隔熱手套」一件，以及「２迪士尼米奇與好友系列圍裙」一件
2) 迪士尼米奇與好友賀年系列 套裝二（$324）：選購「迪士尼米奇與好友系列賀年年糕禮盒」一盒、「迪士尼米奇與好友系列隔熱手套」一件、「迪士尼米奇與好友系列圍裙」一件

法式心動‧雪糕馬卡龍禮盒 Häagen-Dazs™

如果你係甜品控，呢個「法式心動‧雪糕馬卡龍禮盒」一定啱你口味！Häagen-Dazs™聯乘法國著名甜點大師Pierre Hermé製作嘅雪糕馬卡龍，法式馬卡龍酥脆煙韌，夾住滑軟嘅雪糕，口感豐富。一盒有齊士多啤梨紅桑子馬卡龍雪糕、雙重朱古力馬卡龍雪糕，以及芒果馬卡龍雪糕各2件，一家人開心share甜蜜時光。

文：Cathy