麥明詩宣布婚訊後首現身大談求婚經過 自爆短期內公佈婚禮詳情：快靚正

麥明詩（Louisa）早前就公開同男友盛勁為求婚嘅片段，公布婚訊。今日（1日），Louisa喺公佈婚訊後首次出席活動就回應婚禮籌備過程。對於婚禮嘅日期，Louisa就表示會喺香港市區舉行，直言自己係秉持「快靚正」嘅理念去預備婚禮，所以短期內都會公佈詳情。至於提到理想中嘅婚禮，佢更加話：「想將Focus擺喺賓客，希望佢哋玩得開心，同埋唔好悶，我成日去好多婚禮都好悶，所以盡量花多啲心思，將資源唔好擺喺啲為做而做嘅嘢，而係令到大家同自己Enjoy嘅事情上面。」

講起未婚夫盛勁為，Louisa亦都冧笑大讚佢嘅優點值100分：「講真每個人都有長處短處，好難要佢又唔管我又細心，佢啲優點係我要嘅嘢。」佢亦都提到未婚夫嘅優點：「好隨遇而安，好多嘢唔會諗太多亦都唔會太多意見，所以我哋都相處得幾好。好欣賞佢好堅韌，佢人生可能經歷一啲低潮嘅時候都會保持到一個好正面嘅心理狀態，咁我覺得呢樣嘢比起所有嘢更加寶貴。所以我會有信心佢會有積極嘅心態同埋大家會開心。」

被問起係咪趕生仔，Louisa亦都話想趁唔係咁大年紀，仲有精力嘅時候去組織家庭，不過就提到一切順其自然。