雅虎香港新聞 電影LOL︳80年代女神波姬小絲 宣布角逐美國舞台演員工會主席
上任9年嘅美國舞台演員工會主席Kate Shindle早前宣布離開呢個崗位，本來對香港觀眾而言唔係咩大新聞。但係跟手見到有意角逐主席一職嘅，係唔少香港人都認識嘅80年代西洋女神波姬小絲(Brooke Shields)﹐就令小編想八下咩事。
波姬小絲拍咗條片表態參選，佢話覺得自己有義務肩負重任，而且多年來同業界並肩作戰，自己希望日後可以繼續支持大家。波姬小絲又提到自己曾經代表劇界到華盛頓進行游說。
觀眾對波姬小絲嘅印象可能仲係電影，但原來佢參與過多個百老匯製作，當中包括歌舞劇《芝加哥》同埋舞台劇版《愛登士家庭》。
今年58歲嘅波姬小絲係童星出身，未夠一歲已經拍廣告，童年時代已經做緊model，12歲時被相中為電影Pretty Baby演雛妓而備受爭議。到14歲時所拍嘅《青青珊瑚島》，講述一對少男少女流落荒島嘅經歷，片中唔少大尺度畫面，香港觀眾應該喺明珠台睇過。波姬小絲話有替身代演裸露場面，但係劇組當時嘗試令佢同男主角Christopher Atkins撻著，反而令佢更唔高興。波姬小絲未成年時以model身份拍過裸照，因此引發唔少爭議。
波姬小絲80年代中期入讀普林斯頓大學，幕前演出減少，聲勢亦不如從前。而佢喺影壇嘅不光榮「成就」可能係多次成為「金草莓獎」得主，三度成為「最差女主角」，甚至獲得「90年代最差女主角」同埋「世紀最差女主角」……
演技唔代表一切，曾經公開自己被性侵經歷、曾經就湯告魯斯對情緒病治療的言論作公開批評嘅波姬小絲，的確有過爭取自身以至女性權益嘅經驗，一旦佢當選舞台演員工會主席，希望可以為業界爭取更好待遇同權益。
更多電影文章
電影LOL︳《壞蛋獎門人4》夾計 NBA球星腩肉哥Jokic變身犀利哥
電影LOL︳安夏菲慧爆曾被要求試鏡同十個男人錫咀 直言「好嘔心」
電影LOL 周五電影快報︳Netflix老細保證內容「重質重量」／馬田史高西斯拍唔到歌王傳記片係因為…／荷里活工潮過後 影視行業開工量減少
電影LOL︳奇洛李維斯聲演《超音鼠3》 做反派 仲有3套新片在手 有冇時間結婚？
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
