電影LOL︳複製《人工殺姬》票房奇蹟？新片Imaginary魔性熊寶寶打搞細路

荷里活近年大片失收，反而舊年年頭嘅《人工殺姬》(M3GAN)食正人工智能話題，以千零萬美元成本，劈出1億8千幾萬票房，證明觀眾肯入場睇戲嘅……你條橋有趣，套戲有口碑咪得囉。

專門開拍驚慄片兼製作《人工殺姬》嘅公司Blumhouse，即將有套新戲Imaginary喺3月上映，就甚有《人工殺姬》嘅味道嘞。故事講述一個小女孩Alice同繼母Jessica一齊生活，有日佢地搬去Jessica細個住過嘅地方，Alice喺屋內搵到當年Jessica嘅兒時玩伴熊啤啤Chauncey。Alice同Chauncey越來越親密，反而令媽媽日發不安，更加思疑Chauncey唔止係一隻玩具熊咁簡單……係咪有啲似《人工殺姬》，再溝埋《賤熊30》嘅恐怖版先？

話晒Blumhouse拍開驚慄片，捉到大家邊啲位會驚，jump scare突發式嚇人位一定有，最得人驚係Alice話Chauncey有個任務清單俾佢，完成晒Chauncey就會帶Alice去佢嘅老家，而清單上有一樣任務係「傷害自己嘅東西」……跟手，Alice喺後院圍欄拆塊木板出嚟，上面有口釘，Alice想一手拍落去……盞打返呢一段，我都驚驚地。

可能因為見到《人工殺姬》收得，根據外媒Deadline報導，去年2月、亦即係《人工殺姬》票房成績有驚喜嗰排，發行商Lionsgate買下Imaginary嘅發行權，電影跟住喺上年夏天開鏡。Imaginary同《人》一樣都係千零萬成本，想刀仔鋸大樹嘅意圖好明顯啦。電影將於3月8日北美開畫，台灣會遲一星期上映，香港映期暫時未知，但相信好大機會有得睇。

更多電影文章

電影LOL 今期睇咩戲︳特工亞皆老／年會不能停！／劇場版 SPY × FAMILY CODE: White

電影LOL︳《魔盜王》部署飛起尊尼特普 The Bear黑人女星有望接棒

電影LOL︳許鞍華擔任柏林影展國際評審 評選競賽單元得獎電影

電影LOL︳泰國情慾恐怖片《邪妓》社會寫實＋情色＋靈異 勁有舊式港片風味

電影LOL︳DC女超人選角確定 《龍之家族》Milly Alcock揮低一眾女星脫穎而出

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！