電影LOL︳奇洛李維斯聲演《超音鼠3》 做反派 仲有3套新片在手 有冇時間結婚？

早幾日，奇洛李維斯同女友Alexandra Grant罕有聯袂出席活動，仲喺鏡頭前錫錫，令到早前傳出奇洛李維斯有意迎娶女友，甚至話佢唔打算簽婚前協議云云。

近年奇哥憑《殺神John Wick》系列人氣再上一層樓，工作當然排住隊。最新消息係年底上映嘅《超音鼠大電影》第3集入面，奇洛李維斯將會聲演超音鼠今集敵人Shadow，係由政府秘密培育而成，雖然同超音鼠係同類，但角色性格南轅北轍。早喺第一集《超音鼠大電影》入面，奇哥已經現身 － 片中超音鼠睇緊奇哥成名作《生死時速》，結果第3集直情加入獻聲！

早前戲院業界活動CinemaCon入面，Lionsgate介紹旗下新片Good Fortune，奇洛李維斯係主角之一。故事講述奇哥演嘅天使熱心助人，佢眼見炒散度日嘅主角極之羨慕朋友過住富貴生活，於是安排兩個人交換身份，等窮L主角知道有錢人嘅生活冇想像中咁好。殊不知窮L成為有錢人之後，完全唔覺得生活空虛，天使因為呢次失敗計劃而被打入凡間。

Good Fortune本來去年中開鏡，但因為遇上演員工會罷工而延期至今年初。點知奇洛李維斯開工期間發生意外令膝頭受傷，好在套戲係喜劇動作唔使太多，只係一場跳舞戲要搵替身完成。有媒體報導時話，奇哥拍《殺神John Wick》打到飛起都冇事，今次把文戲居多反而出事……

奇洛李維斯另一套新戲Outcome係由拍喜劇起家嘅演員Jonah Hill執導，片中奇哥演過氣明星，被人用一條影片勒索，為咗搵出邊個係幕後黑手，奇哥決定同得罪過嘅人重修舊好。兩套新戲暫時都未有上映日期……係咪因為奇洛李維斯要「辦喜事」，所以要夾過晒啲宣傳檔期？

更多電影文章

電影LOL 今期睇咩戲︳但願人長久／破墓／美帝崩裂／排球少年!!垃圾場的決戰

電影Rust道具槍走火射殺女攝影師案件 劇組槍械專家被判監18個月

電影LOL︳《美帝崩裂》成淡市票房冠軍 出品獨立片廠A24有力挑戰影壇巨企

電影LOL︳業界大事CinemaCon 迪士尼高層爆粗讚《死侍》贏盡掌聲

電影LOL︳《BJ單身日記》宣布拍第4集明年情人節上映 當年講溝仔而家講湊仔？

電影LOL︳Zendaya大讚新片床戲有「動作指導」呢份工原來要做呢啲嘢

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！