陳蕾演唱會被網民留言狠批好難聽 梁祖堯反擊：有入場嘅人都會知自己聽咗啲乜

陳蕾首個個人紅館演唱會《念》喺日前（5日）圓滿結束，演唱會分成五個主題：「死」、「惑」、「念」、「生」及「能屈能伸」，為觀眾帶來聽覺享受與視覺效果。不過，陳蕾演唱會反應兩極，有網民覺得陳蕾「中槍」淌血和「瞓棺材」畫面配合歌曲演繹相當震撼，但有網民就不解點解首場要請去年退出《全民造星V》決賽嘅Nathan（魏念恩）當其中一位嘉賓彈奏樂器；亦有部份網民及音樂人周啟生認為陳蕾唱功唔穩定。

有到場睇陳蕾演唱會嘅梁祖堯就出PO大讚陳蕾，讚賞佢演唱會好好睇，亦係近年睇過最好睇嘅紅館演唱會：「冇嘢，可以挑剔。 滿分。 勇敢赤裸，真誠動人」；不過有網民就似乎唔係好認同梁祖堯嘅睇法，喺帖文下留言：「好難聽」，結果引起梁祖堯注意，親自回應反擊：「打手，我知你都係搵食啫。你打啲咁嘅嘢無用㗎。有入場嘅人都會知自己聽咗啲乜。人哋10幾年努力唔係你收幾毫打幾隻字就可以動搖到嘅。正正經經搵啲嘢做啦。積吓陰德，散播網絡仇恨有咩咁好呢？」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！