郭嘉駿《B出口》唱盡香港愛情面貌 吳海昕任女主角「慘遭家暴」 邀何啟華做MV導演Budget歷來最多

郭嘉駿193今年首支單曲〈B出口〉，其實是香港年青人的愛情寫照，今次除了早前公布了由何啟華Dee首次操刀執導MV外，更有之前與193合作舞台劇的吳海昕Sofiee加盟演出，鐵三角組合，想不到竟然發生家暴事件，Sofiee更弄得滿手瘀痕！！！

今次〈B出口〉由台灣音樂人宋星凱及葉懷佩作曲，林若寧填詞，是很多香港人的愛情寫照，193道：「〈B出口〉講好多人與人之間嘅邂逅，例如：搭地鐵遇到心儀對象，可能一齊咗，之後過一排又邂逅其他人。好多偶遇好多離離合合，呢個就係好多香港人嘅寫照。」既然是一首屬於香港人的情歌，193很想在歌曲中記錄當下的愛情以外，更想記錄香港，他續道：「林若寧寫詞嘅時候，我叫佢加多啲香港地方元素，記錄返香港呢個時間呢個地區，因為好多時有啲地區經過年月變化，又或者好多唔同因素會變咗好多，甚至係有可能冇埋條街，所以歌詞裡面嘅街名比較大路，彌敦道、太子道、擺花街，另外亦有提及花墟。」

早前已公布，今次〈B出口〉由ERROR隊友Dee執導。既然大導揸Fit，自然Budget也較多，193大爆：「MV 因為有Dee大導，係歷年來𢱑得最多Budget嘅MV！如果用〈睡到三點〉同〈再次Puppy Love〉去比較，Budget係多十幾倍，所以都幾誇張。Dee大導好多想法，話要爆破！話應該冇乜人MV會爆破，所以要爆破。然後又要流血！好多奇怪諗法！」諗法多自然拍得多，193都想不通Dee的想法，他說：「我哋分咗兩日拍，每日拍咗十幾個鐘，啲劇情係多到我覺得可以出一個劇場版，起碼30分鐘都仲有嘢剩，多到痴線，我都唔明Dee可以點樣整落去。」

〈B出口〉作為情歌，當然要有女主角，但原來過程中曾經換角，193解釋：「本身MV係諗住搵另一個女主角，係傾好咗嘅，但去到開會嘅時候，Dee度咗好多劇情嘢，但當時想搵嘅女主角，係大約20歲嘅女仔，同我年紀差好遠，我哋點樣回憶返我哋十幾廿年前嘅片段呢？十幾廿年前佢仲係粒卵子⋯⋯然後諗起Sofiee，佢同我啱啱做完舞台劇《Laugh Vacation》，係一個幾好嘅選擇，同埋佢係一位好演員，所以唔使諗就係佢。」

193十分感謝Sofiee不計酬勞，近乎貼錢演出，與此同時，他亦深感歉疚，因為在拍攝過程中，他整傷了Sofiee。193說：「有場情緒戲，拍咗好多次，可能有7、8 Take，Dee 老師有好多唔同要求，我哋都跟足做，其中我要同Sofiee鬥力，我要雙手捉住佢阻止佢發癲，但我估唔到自己天生力大無窮，打開籃球嘅右手捏佢左手，結果捏到瘀晒，估唔到瘀到好似家暴，唔係一般嘅瘀，幾個鐘頭後已經變到紫黑色好似中毒一樣，所以我都好過意唔去。」不過193表示Sofiee要自求多福，因為劇組未能夠讓她索償醫藥費。「我頭先有Offer，最多買支去瘀膏或者跌打酒俾佢，但Sofiee冇理我。」對於被捏到滿手瘀痕，Sofiee就說：「兩睇啦！望落去就疑似好暴力，但對於33嘅老婆嚟講，佢係好大隻呀！平時係有操開，都有啲功力。」