逆天奇案2｜藝人撞樣拼圖做法庭證據好兒戲 網民：一套正劇竟然喺度搞笑

TVB劇集《逆天奇案2》由陳展鵬、林夏薇、馮盈盈、黃智賢及蔣祖曼等人主演，劇集自播出以嚟收視不俗，但口碑就認真一般。去到噚晚（24日）嗰集，鍾大狀Hazel（蔣祖曼飾）喺打爭產官司時，竟然拎咗幾張藝人撞樣嘅拼圖，去證明就算外貌相似都可以冇血緣關係，引起網民熱烈討論。

噚晚劇情講到杜匡珉律師（王賢誌飾）為錢主動提出幫自稱係尤麗胞妹夏悠倩（劉佩玥飾）打爭產官司，喺過程中兩位律師鬥得難分難解。期間鍾大狀Hazel竟然喺冇DNA證明之下，竟然拎咗幾張藝人撞樣嘅拼圖，然後指相中藝人雖然外貌相似都冇血緣關係，包括譚俊彥與李政宰、已故藝人魯芬與PSY、吳鎮宇與墨西哥門將奧祖亞（Guillermo Ochoa）及阮兆祥與盧覓雪。

劇集播出後，隨即引起網民熱烈討論，並認為呢啲都可以做法庭證據好兒戲，例如「變咗搞笑片」、「冇巴斯光年」、「竟然冇哈林同庾澄慶」、「個幾張"人有相似"相笑X死!」、「不能說是非常相似, 只可以話係完全一樣」、「點解唔用周華健同周文健做例子」、「這段對比圖笑死」、「又玩尷尬」、「一套正劇竟然喺度搞笑 ？」及「我笑噴了哈哈」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！