試當真舊Studio有鬼附身游學修模型 510驚到想喊與Sica反應大不同

YouTube頻道「試當真」最近再度搬新Studio，日前於《試當真謝票場 第166週》直播請來Sica和白水做嘉賓，傾傾吓Studio環境，游學修突然自曝：「之前嗰到有鬼㗎！佢喺我房嗰啲蝙蝠俠到啊」，Sica聽到後反應超驚訝地表示：「真係㗎？」

「試當真」早前《試當真謝票場 第166週》直播大談「師生戀」話題；去到中場小休就嚟個新Studio Tour，之後眾人又討論對「上司下屬戀」嘅睇法，傾傾吓就提到新Studio環境，大家都覺得呢到好正能量同Warm啲，Sica表示：「之前嗰到呢…」逐被游學修打斷話句，游學修直言之前嗰到有鬼，已請師傅將鬼魂鎖於模型盒內，更指住鏡頭外表示其中一個附有鬼魂嘅模型都喺現場。Sica興奮地詢問：「我可唔可以同佢傾計啊？係唔係好貴㗎？我想問你係點樣上身㗎？」阿水就接過嗰盒有鬼魂嘅模型，並指自己唔驚，可以有能力治到佢。510（吳伊琳）聽到呆晒，又問游學修係點知有鬼；游學修回答指：「我哋有觀眾嘅朋友睇我哋啲片嘅時候，見到就話『阿修間房有啲污糟嘢喎，喺啲公仔度喎。』跟住第二個都係觀眾隔住嗰Mon講嘅。」另外，豪哥又表示自己爸爸都叫過游學修唔好擺啲公仔喺後面：「我問佢點解，佢好鍾意㗎，佢話啲公仔咪係小人囉。係喎，我心諗真係小啲嘅人」，當時510就驚到想喊咁款，阿水又指住模型問：「佢係咪笑緊啊？點解我見到佢笑緊嘅？」，游學修就拆開個盒同Sica研究個，蝙蝠俠模型個樣，Sica好玄咁話：「佢有笑緊，但佢唔係笑緊」，游學修就表示：「無嘢㗎」，之後就畀返阿水放喺地下，再開新Topic《科目三》研討會。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！