福祿壽訓練學院｜阮兆祥帶領「KOWLOON」神還原「LOONG 9」 李佳芯被擺上枱

由阮兆祥、王祖藍、李思捷主持嘅TVB扮嘢真人騷《福祿壽訓練學院》前晚（14日）播出一集，與24位學員暫時放下競賽心態，攜手打造一場土炮多元化嘅頒獎禮。節目中，二次創作「話題」劇集及影畫以外，更有模仿世界各地藝人和動漫人物勁歌熱舞環節、頒發「年度電視演員」、「年度電影演員」及「年度歌手」獎項，更惡搞歌影視作品提名片段，期間不時加插四大天王、Twins、容祖兒等昔日出席頒獎禮嘅片段，疑似要用該集節目與ViuTV直播《第42屆香港電影金像奬》對撼，節目中唔少內容都成為網民討論話題，有網民就表示：「唔講以為播緊金像獎」，以下抽出6大重點回顧。

郭珮文、陳懿德扮「人肉獎座」
「扮公室助理」郭珮文（Juliana）及陳懿德（德德）穿上超緊身連身衣扮「人肉獎座」，需要喺長達十數小時嘅錄影過程中多番舉起雙手「扮獎」 ；郭珮文個造型單係臉上金色部分要先後兩次上色，需時兩個鐘，至於陳懿德嗰套衫就好難著，需要有4至5個姐姐幫手穿著，以及為身上嘅金色菲林「定位」已用咗兩小時，唔少網民都戥佢哋慘，批評節目組唔人道。

阮兆祥帶領「KOWLOON」唱跳
早前，《亞洲超星團》LOONG 9成團討論度爆燈，阮兆祥於《福祿壽訓練學院》上以「祥沙灣」與旺角（陶大衛）、石硤尾（葉泓聲）、荔枝角（關嘉敏）、九龍灣（黃建東）、黃大仙（王玲）、牛頭角（劉倬昕）、深水埗（吳兆麟）、油麻地（黃潤成）組成「KOWLOON」大唱亞洲超星團主題曲《閃耀／Shining》，網民激讚佢哋扮得似「LOONG 9」：「樂壇絕對欠祥沙灣一個交代！！！」、「竟然跳得比原版仲齊，笑死，推到出道」、「幾時攪簽唱會，我一定捧場」、「跳得好過原版Loog 9 ，阮兆祥好厲害，跳得好。Kowloon」、「而家我正式宣佈： 『KOWLOON正式出道』」等等。

鄭燶基扮鄭中基
節目設三個「惡搞」獎；「年度電影演員」組別最後四強提名名單為國貨城《臨時截案》、涼茶偉《啜手指》、子華塵《鴨舌大狀》、鄭燶基《龍咁基》，其中，鄭燶基以空姐造型案件重演《龍咁威》劇情，王祖藍就扮李龍基，被陳懿德和郭珮文欺騙，網民大讚好笑：「又玩基哥」、「龍咁威，好X搞笑，抽水到X街」、「鄭燶基似到癡線」、「呢個鄭中基好似」、「抽水抽到盡，正到爆！超有鄭中基影子，可以做替身」等等。

李佳芯被李思捷擺上枱
李思捷模仿李佳芯於劇集《智能愛人》角色「智能人」阿寶，不但將劇名改成《智能雪人》，更出言狂寸李佳芯：「啱啱先由個雪柜行出嚟，所以我覺得有啲凍」，又重演換衫被打格仔一幕，以影射李佳芯被內地平台打格仔一事 ，網民留言：「ali都抽」、「抽演藝人"雪藏"水」、「串tvb雪櫃ali」、「抽演藝人"雪藏"水」等等。伍韻婷又有扮演陳自瑤《婚後事》一幕，網民就覺得扮得都幾相似，仲提議不如抽埋Yoyo早年頒獎禮黑面嘅表情：「抽埋頒獎個黑面」、「真係有多謝佢老婆黑面個part」等等。

細細粒激瘦擔任頒獎嘉賓
陳嘉佳（細細粒）和王祖藍分別係「年度電影演員」頒獎嘉賓，前者以《封神榜》美人妲己造型亮相，後者化身紂王，二人大擺嬌俏甫士，細細粒去年因健康響起警號積極減肥，成功於半年搣甩121磅，身形明顯縮水，網民留言：「瘦咗、靚咗」、「一直以來都好喜歡細細粒」、「笑死，紂王坦己」、「細細粒正左咁多」等等。

盧海鵬獲頒榮譽博士
「扮嘢界始祖」盧海鵬激罕出場，獲頒榮譽博士，除咗製作組預備長約2分鐘盧海鵬昔日經典扮嘢造型嘅影片，阮兆祥、王祖藍、李思捷亦分別致敬鵬哥一段經典模仿，盧海鵬領獎時不忘講笑：「大家好，我係盧海鵬，喺TVB做咗好多年架喇，但係始終都冇獎項呀，點知而唔撈咁耐喇，佢又記得喎。」有網民就指聽完盧海鵬呢句好心酸：「鵬哥講：『做TVB咁耐都無拎過獎，而家就請佢上嚟拎獎』，聽完都心酸」、「好感動！睇番D片真係勁！」、「睇到眼濕濕」、「看到盧海鵬更回味不少，攪笑技巧誰人能及！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！