睇片｜「元朗照相」經營一甲子 九旬老闆擬今年結業：離唔開，聞慣呢個味道｜Yahoo

【Yahoo 新聞報道】從人聲鼎沸的鬧市鑽進「元朗照相」，貼滿畢業相和全家福的唐樓樓梯恍如時光隧道，彷彿回到 60 年代。「元朗照相」於 1963 年創立，為目前區內歷史最悠久的照相館。從人手上色走到數碼時代，照相館以便宜和特快取貨作招徠，曾日吸逾 600 人光顧。走過了一甲子，九旬棠哥坦言現時客人數量大減，加上年事已高，或於今年內結業，「有啲失落感，但人生幾十年，遲早都係『日本郵船』（遲早完），係咪？」

文字記者：盧珮瑤
攝影記者：Oscar Liu

踏上福康街唐樓昏暗的樓梯，進店後扭開收音機，準備相機和佈景板，是「元朗照相」創辦人譚增棠夫婦 61 年來的指定動作。與新興攝影相館不同，「元朗照相」別有懷舊風味：暗白燈光加上碎花牆紙、用不同布料搭出佈景板，更有塑膠花、毛公仔、帽子作攝影道具。在社會急速變遷期間，這片角落保留舊香港情懷，亦是譚增棠和太太一輩子的寄託。

照片人手上色「出光起陰」

1951 年，棠哥只有 17 歲，偕堂哥和叔叔由佛山三水來港，遇上 50 年代戰後蕭條，「嘩！乜香港住嘅環境咁差！阿叔本身上面住大屋，落到嚟得樓梯底一張床位」。堂哥和叔叔熬不住跑了回鄉，唯獨愛玩的棠哥找到西環一間影樓的學徒工作，月薪 180 元，「本身可以去做警察，但人工差唔多，起碼唔使喺街曬呀嘛！」

當時攝影業包含多個工種，拍照、沖曬、執相底，彩色照片須靠照相館師傅以手工上色，「師傅只會教你少少，唔想你學晒，一陣你學晒爬過佢頭」，為爭取出師，棠哥每晚自學練習，「嗰時有麗的呼聲，師傅喺度打麻雀，我就每晚學到麗的呼聲停，（晚上）12 點」。

上色由溝色、力度均學問處處，最難掌握是「出光起陰」，使人物具立體感，「唔係淨係髹上去，咁咪變油畫囉！要先出到鼻樑，最後一步先打胭脂」。棠哥上色時需視乎相中人面色決定深淺，「面色深，支筆頭舐少少髹落去就得，由深色髹到淺色」。

棠哥以一年時間自習出師，輾轉到過港九 6 間影樓工作，「嗰時我喺外面未曾失業過」。這樣的際遇非單源於運氣，他邊學邊做，希望熟習所有攝影工種知識的毅力，「出嚟搵嘢做，你要搵黑房，我識；要『色蠟』（上色及執相），我識，自己學習嚟係充實自己」。

靠兄弟會集資 萬元自立門戶

1962 元，棠哥於元朗當時最大型相館、新星攝影院工作邂逅現在的太太。如今譚太憶起初相識之時，上下打量棠哥，「我媽當時要殺死佢！佢『百無』㗎嘛，係咪要殺死佢！」單靠百多元月薪難以成家立室，兩人決定婚前自立門戶開相館，租下元朗福康街現址舖位，怎料單計開業開支已高達一萬元。那時香港流行「兄弟會」，多由同齡兄弟組成。每當成員有需要時，一眾「兄弟」會湊錢互助，「會仔」亦可賺利息。靠兄弟之力，兩人成功開店。

開業初期，兩人既要兼顧生意且要還債，棠哥不時要替其他攝影院做外影賺外快，譚太亦要「落場」影相，奈何生意仍未好轉，「以前出九龍有 1 蚊 pass（車票），1 蚊出 1 蚊入，2 蚊搭車出去淨係夠錢買到一盒 10 蚊相紙，你想像吓窮成點，真係欲哭無淚」。

出名平靚正 「做得靚自己好開心」

她決定以「平」和「快」作招徠。當同行拍攝半打學生相需至少 1 元，元朗照相劈價至 8 毫子，更可翌日取貨，棠哥和太太每晚漏夜趕貨，「唔好喺錢方面著眼，要由客人角度出發。當時啲人睇一個幾毫睇得好重，爭少少人哋都會走咗去，天星小輪罷工都係為咗斗零啫！」那年代肯捱就有出頭天，相館每逢開學時期日吸逾 600 個學生哥光顧。

曾受多間影樓訓練的棠哥堅持相片「一定要靚」，全因口碑是致勝關鍵，「我哋比較注重出品，張相自己接唔接受到好緊要，如果唔靚，人哋一問『邊個影㗎？』，咁你咪即係幫自己『宣傳』囉？做靚張相，你自己都好開心、好舒服」。自此平靚正成為元朗照相標誌，「元朗以前有 10 幾間影樓，我哋企到今時今日，就係人無我有」。

熱鬧歸於平淡 盤算結業「有啲失落感」

60 年代後期攝影行業興旺，棠哥曾於同區先後開設另外兩間店舖，包括阜財街的「心心婚紗攝影」和壽富街「元朗沖曬」，但因工作量太大最終結業，專心經營元朗照相。當時相館的攝影服務由全家福、畢業相、學生相，以至車牌、藤器出口貨辦均一手包辦，「總之要攝影嘅就會搵我哋」。每年開學店內擠滿學生哥，過年亦是另一高峰，「啲人買唔起相機嘛，個個每月都得 100 蚊，相機閒閒地一千幾百」。家家戶戶恤個靚髮、穿得紅噹噹來拍全家福，「我哋 100 個冧把一個單簿，過年會開兩、三個單簿，排晒隊」。

走到數碼攝影時代，相館的需求亦慢慢褪色。元朗照相目前只餘寥寥熟客光顧，拍攝畢業相、全家福為主。在沒有客人的日子，兩口子會在店舖聊聊天、過日辰。不過，隨年紀漸長，相館或於今年內結束營業，「離唔開，聞慣呢個味道、上慣呢條樓梯，有啲失落感，但人生幾十年，遲早都係『日本郵船』（遲早完），係咪？」

這片角落盛載了一頁攝影業歷史，還有兩口子為對方打拼的回憶。有甚麼說話想告訴對方？棠哥率先舉起大姆指，「真係難為呢個太太，唔知點捱」。身旁的譚太看著棠哥，淺笑如昔，「我嫁佢咁窮我都未驚過，流眼淚就抹乾淨啲眼淚，使死呀？肯做就唔怕」。照相館去或留，但願人長久。