5大日式火鍋/鍋物推介 日本過江龍新店、北海道夢幻海鮮湯

冬天梗係要食shabushabu啦！今期搜羅咗幾間供應日式火鍋或鍋物嘅餐廳畀大家，讓大家過一個暖笠笠嘅冬日～

火鍋放題 + 壽司放題 旬彩火鍋

來自日本東海地區嘅火鍋店開首間海外分店！本店位於日本愛知縣，主打「一家一火鍋」嘅溫馨風味，希望一家大小嚟到都可以盡情享受美食。除咗供應日本店三款常設日式湯底，包括壽喜燒湯、旨辛湯同昆布湯外，重有香港限定嘅豚骨湯、豆乳湯同番茄湯。壽喜燒湯係店主鑽研多年嘅秘方，還原到喺日本食火鍋嘅味道；而火鍋料則分別選用美國牛肉、澳洲種和牛同日本黑毛和牛，晚餐更附有壽司放題同自助吧，好豐富呀。

北海道夢幻海鮮湯 牛気（銅鑼灣店）

呢間人氣日式火鍋放題嘅銅鑼灣店，以全新面目重開，更推出限定北海道系列食品。首先三位或以上惠顧Lv5或Lv6放題套餐，即可免費升級至「和牛大滿貫」，爐邊放上特別訂製嘅環形精美木盤，盤內有齊多款食材，包括澳洲極上和牛、特選牛小排、牛舌、日本赤雞雞爽肉、牛骨髓、脆鯛魚片、鮑魚、烏雞卷，打卡一流！最推介係分店限定北海道夢幻海鮮湯，以赤味噌湯為基底配搭海鮮拼盤，涮過海鮮後嘅湯底超鮮甜。其他北海道系列食品包括北海道風炙燒芝士帆立貝、十勝紅豆豆乳冰豆花、奶蓋白玉丸子、蜜瓜卷蛋等～

高質黑毛和牛 本延鍋物

裝潢以白色同啡色作主調嘅日式火鍋店，環境悠閒舒適。主打日式涮涮鍋同壽喜燒，配以高質黑毛和牛。湯底三選一，包括關東風壽喜燒、日式昆布上湯湯底同柚子胡椒湯，其中壽喜燒湯香甜惹味，柚子胡椒湯就清新開胃。牛肉分為4個等級，由日本A4黑毛和牛到A5黑毛和牛肉眼，油花分布都一樣咁靚，當然和牛肉眼就大大塊，食落更滿足。

A5和牛火鍋放題 黑樺牛

A5和牛放題呀！牛魔王準備好未？呢間嚟自日本嘅火鍋店，以自家培育嘅黑樺牛為主要食材，120分鐘可以任食唔同部位嘅A5和牛，而和牛火鍋放題套餐包括8款A5熊本和牛、4款佐賀名水豚，以及多款自家製食品同麻辣小食等。偏愛油花嘅朋友，可多點特上霜降小排同上肩胛肉；如果鍾意有啲咬口，千本筋就啱晒，特別有嚼頭又唔會韌。

溫野菜鮮雞白湯火鍋 北海丼

日式丼飯專門店「北海丼」推出全新「鍋」心暖意嚐味之旅，以火熱美食驅走寒意！推薦呢個溫野菜鮮雞白湯火鍋，濃稠嘅湯底以優質新鮮雞肉熬煮而成，鮮香醇厚，配上嫩滑雞件同爽口彈牙嘅雞肉丸子，每一啖都充滿雞嘅油香但又唔會膩。另外都有好受歡迎嘅A4和牛及宮崎豚肉壽喜燒，兩款鍋物都配上唔同嘅迷你丼飯同小食，食到捧住個肚走呀。

文：Yanica
編：Cathy