4間得獎意大利餐廳精選 自家製彈牙意粉、當地鮮味食材入饌

意大利菜係受歡迎嘅菜系之一，更設有全球最佳意大利餐廳選舉，而2024年度前50位之中，香港就佔其中2席。另外重有其他高質嘅意大利餐廳喺唔同項目中得獎，想試就mark實以下4間餐廳啦~

「2024全球最佳意大利餐廳」第19位 Giando Italian Restaurant & Bar

主廚設計菜式時，以宣揚傳統意大利飲食文化同歷史為理念，堅持選用最新鮮、高質嘅當地食材，包括嚟自意大利頂級精品酒莊、傳統生產商同小型家庭農場，每星期由當地直送到港。而一系列正宗意大利菜餚中，自家製意大利粉係人氣款式，其中招牌Spaghetti ai Ricci di Mare採用新鮮海膽同烏魚子製成，鮮味十足；而一粒粒嘅Cavatelli則充滿咬口。

近年其他得獎項目：
2023年度Gambero Rosso紅蝦評鑑（意菜界米芝蓮）獲得最高級別嘅「Tre Bicchieri」三杯酒

「2024全球最佳意大利餐廳」第47位 8½ Otto e Mezzo BOMBANA

餐廳於各個項目中屢獲殊榮，更加係米芝蓮得獎常客！主廚Umberto BOMBANA被譽為「白松露之王」，亦以創新手法演繹傳統意大利，突破固有框框，好似Hazelnut Millefoglie加入大溪地香草醬、榛子朱古力忌廉配榛子gelato，入口好清香。而主廚開設嘅餐廳之中，呢間以佢最鍾意嘅電影《 8½ 》為設計概念，充滿藝術氣息之餘，同時係本地收藏最多意大利葡萄酒嘅餐廳之一。

近年其他得獎項目：
2024黑珍珠餐廳指南二鑽餐廳
2012-23米芝蓮三星餐廳
2022亞洲50最佳餐廳第48位

「2024富比士旅遊指南」蟬聯四星餐廳 Cucina

連續五年獲得富比士旅遊指南四星餐廳，實力可見一斑。嚟到不妨試試意籍總廚Andrea Delzanno炮製嘅招牌燒地中海八爪魚、皮埃蒙特韃靼牛肉，前者用上由地中海直送嘅八爪魚，配搭北海道帶子、酸甜嘅番茄等，盡顯意大利南部風味；後者則以頂級意大利費桑拿牛肉、羅勒乾、黑松露等入饌，香氣同口感層次豐富。另外重有總廚祖父嘅家傳食譜，如意大利燉牛肚都值得一試。

近年其他得獎項目：
2021 Wine Pairing Restaurants Awards（WINE.Luxe Magazine）Top 10

2023米芝蓮一星餐廳 ESTRO

呢間餐廳可以話係廚壇新貴，拿玻里出生嘅主廚Antimo Maria Merone主張打破意大利美食規限，更從家鄉美食攞靈感，配合新派方式烹調，無論係新鮮多汁嘅青口Gemmina，或者香噴噴嘅Bottonii意大利粉都令人好滿足。餐廳不時推出限定餐單外，亦會聯同唔同地區嘅意大利餐廳主廚舉辦聯乘饗宴，務求帶畀大家新鮮感。

近年其他得獎項目：
2023亞洲最佳餐廳第62位（首次上榜）

文：Cathy