張致恒夫婦突出PO澄清大仔冇患自閉症 雯雯今自揭屋企被CUT電

張致恒（Steven）與老婆區燕雯（雯雯）喺2019年奉子成婚，婚後佢哋生完一個又一個，總共誕下4個囝囝（張天寶、張天牧、張天朗及張天樂），不過二人屢次傳出離婚消息，被網民指係「離婚界KOL」。早前雯雯喺IG出Story自爆有一個仔患有自閉兼過度活躍症，令佢好大壓力，當時雯雯未有提及邊位囝囝患病，不過去到噚日（15日）Steven同雯雯就喺IG澄清唔係大仔張天寶。

今年2月，雯雯曾喺IG出PO自爆有一個仔患有自閉兼過度活躍症，表示自己一個人冇能力，同一時間照顧到四個小朋友，壓力已接近爆煲，當時雯雯並冇提及邊位囝囝患病。日前，Steven喺社交網站上載一家六口外出食飯，慶祝大仔5歲生日嘅照片，並留言叫囝囝唔好好似daddy咁失敗，做所有嘢都一事無成。不過喺噚日佢哋兩公婆各自喺IG澄清：「我想澄清番天寶係冇自閉」。

另外，「多仔公」Steven嘅經濟狀況一直備受網民關注，而雯雯亦曾公開數臭老公無錢拎返屋企，雖然Steven試過做唔同工作，不過冇一份工做得長，兩公婆不時大呻家中財務問題，搞到佢哋一家嘅經濟狀況一直備受網民關注。。去到今個月初，Steven喺IG分享自己喺尖沙嘴街頭為茶餐廳派傳單嘅開工照片，當時有網民認為佢返工搵錢養家係好事，不過亦有唔少網民就話睇下佢做到幾耐。估唔到去到今日（16/4），佢屋企竟然被cut電，雯雯喺IG Story以黑底白字寫：「要發生嘅，終於都發生，你終於都令到屋企發生俾人CUT電，完全已經唔係容忍範圍之內，小朋友又冇得煮嘢食，又冇熱水沖奶。不停喊，請問你想我點？！」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！