張致恆老婆雯雯再吐苦水 兒子確診患自閉症親人患癌 罕有感謝Steven

張致恆(Steven)同老婆雯雯（區燕雯）2019年結婚後，二人五年抱四，但經常爆出負面新聞，Steven被指欠債唔還，打工又做唔長；而雯雯就間歇性喺社交平台「分享」家事，久不久就鬧老公兼嗌離婚，有網友戲稱雯雯做「離婚界KOL」。

尋日深夜雯雯再次喺IG發限時動態抒發感受，原來今年只係過咗2個月，雯雯就遇到唔少挑戰。「2024一開始…就已經好不幸／有最錫我嘅親人不幸患上癌症／再有兩個狗狗痾血，心臟、肝、胰臟炎 ／ 再有一個仔確診autism plus hyperactivity／坦白講照顧呢類小朋友 無論係身心情緒都係好大嘅學習／我一個人真係冇能力，同一時間可以照顧到四個小朋友，應該話可以照顧到，但係會有一定嘅危險」

「最近 仔仔先跌爆咗隻耳仔，醫生同我哋講呢類小朋友一年起碼會去幾次急症室要有心理準備／而家每一日面對佢嘅行為情緒都係一個好大嘅挑戰／同時因為屋企其他嘅小朋友仲好細／亦都會受到影響／我哋亦都要好努力學習點樣可以得到一個平衡／2023年我可以話所有嘅壓力接近爆煲／雖然我個心裏面確確實實真係想離婚／亦都不斷爆出唔同嘅情緒（不斷流出大家所謂嘅笑話）／連我自己都覺得我自己有精神問題，經常性會出現一個惡魔叫我帶埋小朋友離開呢個世界就可以得到解脱／發生咗咁多事 好現實，咁話俾自己知兩夫妻已經唔係兩個人嘅事／要照顧好佢哋一定要兩個齊心／冇咗是但一個根本係冇可能做到／呢段時間我好多謝stevencheung 都不斷學習點様照顧好仔仔／亦都實實在在多謝你同我一齊面對全世界嘅責罵（話我哋只係識借錢，又唔自己出去做嘢）。當中嘅難處，只要我哋先會明白」

「我哋唯一嘅共識就係做多兩份工／請一個姐姐去幫手／咁樣我哋其中一個先可以完完全全抽身出去賺錢／大前提係要姐姐實實在在到左／我哋先可以出到呢個門口工作／好慶幸仲有唔夠兩個月時間／姐姐嚟到我哋就可以重生／終於可以第自己唔需要再求別人嘅幫助。」

「咁難先行到呢一步／呢兩個月我哋又係咪真係可以咁好彩渡過到？只要堅持唔放棄，就真係可以過到？好攰，每日都真係好攰／我相信先苦後甜 呢一刻叫我做啲乜嘢犧牲啲乜嘢，我都願意／如果可以換來4個仔同狗狗將來可以有安穩嘅生活／其實犧牲自己又有咩所謂／既然咁難先可以行到姐姐差唔多嚟呢一步／上天可唔可以俾機會我哋過埋呢一兩個月？發生咗狗狗嘅事，亦都令我醒覺／其實生活靜靜地平凡安穩就足夠／自己嘅情緒自己知道就足夠／如果能夠過到依兩個月／我希望同自己嘅家人能夠搵一個地方靜靜地渡過／遠離呢個公開又複雜嘅地方」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！