巨塔之后｜傳張可頤12年後回巢演醫療版《新聞女王》女一 曾被列入「叛將」

張可頤早年主力發展內地市場，開設經紀公司做老闆，參與內地綜藝節目《無限超越班》和幕前演出；香港市場方面，對上一次參演劇集已是4年前ViuTV《暖男爸爸》，電影則是賀歲片《臨時劫案》。日前，有傳張可頤事隔12年後回巢拍攝有醫療版《新聞女王》之稱嘅《巨塔之后》。《巨塔之后》為TVB與內地視頻平台優酷合作嘅劇集，以醫療作題材，有消息指演員陣容包括張可頤、陳煒、劉佩玥、陳展鵬、吳若希、張頴康等人，馬國明和蕭正楠則有份客串演出；拍攝日期將定於5月，除咗喺香港拍攝，更會到深圳和歐洲取景。

張可頤1994年參加香港小姐競選，五強止步，但榮獲「最具演藝潛質獎」並與TVB簽約入行，拍攝過《難兄難弟》、《天地男兒》、《茶是故鄉濃》、《金枝慾孽》等多套經典劇集，2003年憑《九五至尊》「呂四娘」一角打敗郭可盈、陳慧珊、宣萱、佘詩曼摘下TVB視后。2005年，張可頤與TVB改簽部頭合約，拍攝內地電視劇《長恨歌》太投入角色患上抑鬱症兼甲狀腺功能亢奮，因而要停工休息兩年；2012年，張可頤約滿TVB轉投王維基旗下香港電視網絡，被指係該台「一姐」，以一集14萬拍攝電視劇《來生不做香港人》，當時佢更表示香港電視網絡自由度大啲，休息時間亦夠；張可頤與黃日華、林文龍和廖碧兒當時就被指係TVB「四大叛將」。

張可頤從影多年，亦先後與宣萱和佘詩曼傳出不和，有指與宣萱不和原因係因為二人於宣傳《難兄難弟》期間互相指大家因遲到和大笑NG而拖慢進度；而與佘詩曼不和則有傳張可頤曾於奪視后後暗寸佘詩曼要多加努力，同時二人合作拍攝《金枝慾孽》期間，有指張可頤臨時加戲令佘詩曼不滿。不過，及後張可頤有回應指，覺得觀眾想像力太過豐富，拍電視劇期間，女演員根本係無時間去搞好多私人問題。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！