婚後事｜網民讚劇情震撼又貼地 陳自瑤首登女一演技大爆發

都會愛情劇《婚後事》由羅子溢、陳自瑤、黎諾懿、賴慰玲、羅天宇、王敏奕等人主演，劇情以唔同主角嘅第一身視點敘事，圍繞四大章節「離婚」、「不忠」、「錯愛」及「修復」去探討愛情及婚姻別具爭議性嘅議題。劇集喺噚晚（26日）首播，而家就同大家睇下網民有咩反應啦！

好睇過《再見·枕邊人》
噚晚劇情係以潘善仁（羅子溢飾）作為視點，講述張明芯（陳自瑤飾）每年都會同囡囡潘悅（鄭淽月飾）一齊整蛋糕為老公善仁慶祝生日。不過幾年之後，二人甜蜜不再，原因係欠債、老爺自私自利及善仁曾有婚外情，導致明芯提出離婚訴訟兼爭奪悅悅撫養權。劇集首播後，唔少網民將《婚後事》與同日首播嘅《再見·枕邊人》作比較，絕大部分都認為《婚後事》好睇啲，原因係林肯監製有保證、劇情精彩又貼地，留言大讚「呢套好睇好多」、「呢套精彩過830好多」、「林肯監制（製）手法..勝過8.30劇幾條街」、「no.1集已吸引有追看性..林肯監制（製）有料到」、「830果套太隱門feel，又沉又悶」、「覺得好看過830個套」、「估唔到咁好睇」、「呢套幾貼地 結婚現實」、「好睇，起初以為普通愛情劇，原來劇情幾震撼，對白都好得。」、「呢套戲有張力 好睇！」及「已婚人士睇依套劇應該會有好深感受」等等。

羅子溢演技有進步又靚仔
羅子溢喺劇中飾演性格沉鬱壓抑嘅潘善仁，同老婆及囡囡生活美滿，喺外人眼中係一個好男人，不過佢竟然背著老婆出軌，導致老婆提出離婚，仲搞到對薄公堂，面對狠妻嘅步步進逼。唔少網民都認為佢演繹得相當到位，演技進步不少嘅同時，靚仔樣依然keep得好好：「大波謙真係幾靚仔」、「演得好好 有望拎視帝」、「個種不捨內疚 隻眼交足戲 好睇」、「今次謙謙的演技進步了好多 内心戲眼神戲都很足 你地都演得好好 火花够晒；期待聽晚新一集」、「羅子溢今次做戲有進步」、「謙仔靚仔左又好戲左」、「羅子溢演得同平時好唔同，好鍾意」、「我已經決定年尾投票給羅子溢，他真的做得很好」、「him him演得不錯」、「羅仲謙真係好靚仔」、「羅先生的演出也有進步，加油！」、「羅仲謙好好戲」、「羅仲謙同佢個女女做得幾好，幾感動」及「謙仔個角色好委屈，今次演得幾好！」等等。

陳自瑤首登女一演技大爆發
噚晚劇情主要圍繞潘善仁及張明芯嘅婚姻，二人由幸福美滿去到明芯提出離婚訴訟，劇情尾段講到潘善仁曾出軌，而張明芯亦有打算原諒對方，不過發現潘善仁仍對出軌對象未忘情，仲偷偷地寫下小說，所以決意提出離婚，仲聲嘶力竭咁大叫要離婚。今次係陳自瑤首次擔正做女一，唔少網民都紛紛留言大讚佢演得自然又到位，仲話佢有資格問鼎視后，例如「推到佢做視后 完全做到由內到外再到返內」、「陳自瑤直情做得好，起碼帶動觀眾情緒，更令我諗起多年前套戲沈默的羔羊。」、「YoYo呢場戲好勁！好有氣場！好真！」、「劇本明顯為YoYo 度身而做，身同感受，全情投入，最受歡迎女角色非她莫屬」、「完全冇over，我細個老母發癲就係咁，睇到有啲嚇親」、「我覺得佢做得好逼真, 七情上面, 好似做返自己咁! 非常非常好, 簡直無可挑剔, 100分! 我第一次拍爛手掌!」、「好戲到 比佢嚇親」、「好入戲，Yoyo啲戲好真」、「視后級出演」、「咆哮的一幕相當入戲逼真…..視后水準」、「Yoyo演得好！夠狠，又有計謀。好震撼，有俾佢嚇到」及「真係好中意睇你演戲 希望你今次可以拎到視后」等等。不過亦有網民認為佢嘅演出過咗火位同好嘈，留言話「唔係大聲就係好戲」、「Yoyo啲戲好誇好表面」、「陳自瑤把聲真係好嘈好難頂」、「Yoyo 好嘈」及「過咗火，好嘈」等等。

羅天宇橫跨兩劇
近年產量唔多嘅羅天宇，喺噚晚首播嘅兩套新劇都有佢嘅蹤影，首先佢喺《再見·枕邊人》飾演流氓律師金長勝，而佢喺《婚後事》就係編劇程天暉，兩套劇集中嘅角色性格都同羅天宇唔同，充滿新鮮感，令網民相當期待，留言話：「天宇, 兩套劇都好吸引 兩套都一定睇晒!!! 要揀都唔知揀邊套」、「又有羅天宇」、「兩線都有羅天宇」、「兩套劇我都會大大力支持」及「兩套劇集都有睇，支持你！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！