停播4年《歌手2024》將回歸 網傳Rosé@BLACKPINK／Bruno Mars喺名單上

內地湖南衞視著名歌唱節目《歌手》（前名：《我是歌手》），參賽者都喺華語樂壇有一定知名度，由一眾實力派歌手同台競賽，節目吸引大批觀眾支持，不過可惜喺2020年播出最後一季。估唔到，嚟到四年後嘅就傳出《歌手2024》重啟消息，近日官方已經喺微博上載大眾聽審團招募信息嘅照片，更傳出節目組已經初步確定首發歌手名單。 消息曝光後，吸引大批網民熱烈討論。

喺上年，微博傳出該節目將重啟消息，但一直未有官方確定，直至近日官方就喺微博宣佈節目回歸，仲上載大眾聽審團招募信息嘅照片。網絡間傳出節目組已經初步確定首發歌手名單，除咗有華語樂壇天王天后之外，仲有國際著名歌手，包括那英、陶喆、單依純、林宥嘉、織部里沙、Blackpink成員Rosé（朴彩英）及Bruno Mars。

另外，網絡更傳出今次嘅賽制同以往唔同，增加至5位補位歌手，其中一位就盛傳係陳奕迅（Eason），唔少網民認為如果消息係真嘅話，那英嘅地位將岌岌可危。其餘四位補位歌手包括金海心、張鎬哲、邰正宵及一位知名黑人歌手。

以往幾屆《歌手》吸引唔少香港歌手參加，包括黃貫中（第一季）、鄧紫棋（第二季亞軍）、古巨基（第三季）、李玟（第四季冠軍）、容祖兒（第四季）及李克勤（第四季）。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！