中年好聲音2丨網民批楊千嬅未夠班做評判 伍仲衡「躺着也中槍」留言反擊

TVB歌唱選秀節目《中年好聲音2》決賽將於周日（24日）舉行，7強選手包將角逐冠、亞及季軍獎項。日前，大會宣布邀請蔡琴任表演嘉賓、楊千嬅擔任評判；楊千嬅作評判消息一出，隨即惹起熱議，有網民批評楊千嬅唱功，指參賽者都可能比佢唱得好，認為佢未夠班做評判；有網民就覺得楊千嬅擁有多年歌手經驗絕對有資格擔任評判，於《中年好聲音2》粉絲專頁發文表示：「其實千嬅嚟做評判都要俾你哋鬧？你要搵晒啲唱歌好掂嘅？仲要千嬅唱歌根本唔差，國內咁多歌手佢都可以咁紅，證明唱功！佢喺國內開演唱會門票秒殺，證明人氣！請佢做嘉賓有何不可？」網民最後又提到《中年好聲音》常駐評審伍仲衡：「難道伍仲衡識唱歌？」伍仲衡真係「躺着也中槍」，而佢本人咁啱睇到留言就將其截圖分享，並反擊該網民：「冇常識嘅人先會覺得做歌唱比賽評判一定要唱歌好聽。」又指無人要求要做嗰個範疇就要識晒所有嘢：「以前成人睇樂評同影評，從來冇覺得啲樂評人要識作曲，從來冇覺得啲影評人要識拍戲，道理一樣啫。」

伍仲衡身兼音樂監製、作曲人、填詞人、音樂導師等工作，而且係歌唱比賽評判常客，音樂經驗豐富，唔少網民都留言力撐：「做評判最緊要公正，唔好就住就住。Harry 敢言先引來批評」、「伍Sir唔識唱歌又如何？識得教識人多就夠喇」、「識唱歌唔代表識評分」、「吾識唱歌吾緊要，識得幫D參赛者改善唱歌技巧就好了，伍Sir絕對有資格做評審」等等。其實，伍仲衡近年經常與不同歌手開Live、直播自彈自唱及擔任《中年好聲音》第五名顏志恒音樂會嘉賓，雖然被唔少網民指佢唱歌難聽，伍仲衡直接回覆網民：「唔係幾難聽，係好難聽！請你不要再聽了，不好意思」，甚至承認自己唔識唱歌：「由於太多人問我教唔教唱歌，我喺度講多次，NO!!!!!!我唔識唱歌，只係識監製歌曲，就是怎樣幫助歌手在錄音室唱得更好聽，就是唱片監製的工作，全是靠耳朵和審美，如果你想我幫你監製歌曲，才問我吧，不過我多數唔應承。」亦有網民覺得伍仲衡比起以前唱歌已有進步，並透過直播感覺到伍仲衡對音樂嘅熱誠。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！