《中年好聲音2》決賽 楊千嬅擔任嘉賓評審 蔡琴做表演嘉賓 古淖文成奪冠大熱

TVB綜藝《中年好聲音2》今個周日晚舉行決賽《中年好聲音2之登峯之戰》，並公布當晚除咗繼續有肥媽、張佳添、陳慧嫻、伍仲衡、周國豐之外，仲會加埋楊千嬅擔任嘉賓評審，而表演嘉賓更邀得台灣天后蔡琴演出，陣容比上一季似乎更強勁！

而今季決賽參加者就比第一季多一位，7強人馬將角逐成為《中年好聲音2》冠軍。根據TVB公布，決賽當晚首回合七強參賽者將選唱快、慢歌各一首，喺評判及觀眾投票得分最高嘅三位參賽者將晉級第二回合，選唱自選歌曲，角逐金、銀、銅獎。而由觀眾網上投選嘅「觀眾最愛好聲音」已經開始投票。

按前幾集排名積分賽次序，七強人馬分別係古淖文、安雅希、譚輝智、顏米羔、黃劍文、沈宗賢及陳俞霏。不過按照上屆決賽，之前嘅分數唔會帶落決賽，因此要睇當晚表現先知冠軍誰屬，但係古淖文似乎成為頂頭大熱。

2009年同陳蕾、羅力威等人參加亞視《亞洲星光大道》嘅古淖文外型煞食，加上同《亞洲星光大道》評判之一肥媽由當年結緣至今情同母子，分數上自然有著數。論演出經驗同歌唱質素，古淖文亦係7強之中較為突出嘅一個，甚有上屆冠軍周吉佩影子。而且以其幕前經驗，古淖文以冠軍人馬身份加入TVB幾乎可以即時埋位，簡直係雙贏。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！