Youtuber馬田與「有啖好食」 同日介紹文苑飯莊 食評兩極一方惹打手之嫌
香港知名Youtuber馬田,其頻道「點 Cook Guide 」擁有百萬訂閱,日前佢就攜父母前往位於黃大仙天馬苑商場,被網上封為「名人飯堂」嘅文苑飯莊用膳,不過佢就指用膳體驗極差,除咗被餐廳營運總監禁止拍攝之外,佢哋仲認為菜式難食又唔抵食。無獨有偶,另一YouTube頻道「有啖好食 Perfect Continuous Eat」同日亦有上載到文苑飯莊嘅用餐影片,不過佢就可以拍攝餐廳環境及每一道菜式,喺影片中更大讚餐廳各樣都有水準,同馬田嘅食評相差極遠,引起網民熱烈討論。
喺影片中,馬田攜父母光顧文苑飯莊,不過就被餐廳營運總監禁止拍攝:「我哋都係靠好多Media、Foodie,都要先預約或者各樣,咁我哋先可以安排。」而馬田亦禮貌地接受餐廳停止拍攝要求,並喺影片中以手繪呈現畫面,分享媽媽食評。當日,佢哋一共下單六道菜式,除咗蜜汁叉燒係可以接受之外,其他菜式都被負評,例如「伊麵係最差嘅,斷晒一轆轆嘅,唔知啲麵係唔係隔夜,新鮮煮好唔會咁樣」 及「炸鱔球炸皮又厚又硬、汁水流失無鮮味。」等等。呢餐飯盛圍1,458元,而馬田媽媽嘅總結就係「唔抵食又唔好食。」,馬田亦附和一句「唔怪之得唔俾人錄影囉,邊個會讚呢間嘢好食㗎呢」。
另一YouTube頻道「有啖好食 Perfect Continuous Eat」同日亦有上載到文苑飯莊嘅用餐影片,不過食評就一個天一個地。「有啖好食」可以拍攝餐廳環境及每一道菜式,仲對食物質素讚多過彈,例如脆鱔球就大讚話「火候一流,咬起來夠脆,裏面仲有汁水,鱔嘅脂香鎖得實,但係整體偏甜,沒有陳皮的幽香,食落有點膩」 ;同時大讚價錢相宜、餐廳環境不俗、食物水準不錯及服務周到。
由於兩者食評相差極遠,所以隨即引起網民熱烈討論。更有人懷疑「有啖好食」有收廣告費,有做餐廳打手嘅嫌疑:「同隔離台差兩個鐘出,今次仲唔係收左錢賣廣告,垃圾食評…」、「完全係廣告片,又唔講明…」、「嘩,信馬田都唔信你啦好心咪暗(揞)住良心講野,廣告就廣告啦」、「點COOK街話好難食喎 差咁遠既? 收錢鱔稿?」、「睇左隔離台,明白哂,完全係廣告」、「要預約拍片先畀好嘢你食?」及「極速畀馬田處刑。收店$」等等。而「有啖好食」亦分別有喺IG及該YouTube影片下留言澄清自己係自費食評:「唉!今次真係有口難辯,經理莫名其妙一句唔俾拍片,我睇馬田條片都R晒頭,心諗文苑都被人吹捧咗大半年,成千上百個foodie圖文片並茂介紹過,我兩餐飯又隔咗3,4個月依家先出片,有嗰句講嗰句,影埋兩張單,冇得招人話柄喇掛?結果都係躺著也中槍,自費都「被廣告」。一間選擇性唔俾人拍片嘅餐廳,真係此地無銀到爆,有咁樣嘅差別對待,睇怕街客都好難能夠一視同仁咁享受到一流嘅服務,前後兩餐飯,食咗十幾款唔同菜式,各自表現如何,片中都已經依心直說,對於有嚐過呢啲菜式嘅觀眾,我講得啱唔啱,同你嘅睇法出入大唔大,你哋自然心裡有數 清者自清 信就信吧~ 遺憾馬田同兩老會遇到咁無稽嘅對待,伯母心明如鏡,強大!」
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!