逆天奇案2｜梁小冰隔26年再拍TVB劇不惜犧牲形象化老妝 與陳嘉輝夫妻檔演出

1990年香港小姐季軍梁小冰為昔日當家花旦，曾演出《鹿鼎記》、《新梁山伯祝英台》等多套經典劇集，至1997年約滿轉投到內地發展，甚少演出港劇。去年，TVB劇集《逆天奇案2》記者會釋出梁小冰客串消息，唔少人都非常期待。終於，梁小冰於前晚（16）播出一集出場，更不惜犧牲形象化老妝飾演歷盡不幸嘅角色。

梁小冰於《逆天奇案2》中飾演「阿蘭/侯淑娟」一角，前晚播出一集講述O記高級警司莫Sir（李國麟飾）重遇消失多年嘅「舊情人」阿蘭，當年莫Sir曾擔任臥底，於潛伏期間認識黑幫頭目侯世秋（彭廸安飾）妹妹侯淑娟（梁小冰飾），對淑娟情愫暗生，不過無奈因上司威逼須利用淑娟對自己嘅感情套取情報，成功瓦解黑幫；淑娟自暴自棄，因犯事於外地受了30年牢獄之災。及後，改名阿蘭並於廟街擺檔，被其他檔主及黑幫欺凌，之後阿蘭接受仁達（陳嘉輝飾）追求，二人計劃移居到葡萄牙，仁達卻被發現店舖藏有黑星手槍惹來官非，阿蘭苦求莫Sir幫助仁達，莫Sir在公在私動用O記接手案件。

梁小冰劇中角色雖然只係40多歲，但由於經歷眾多，因此有滿頭白髮及皺紋嘅角色設定，個樣仲老過佢真實年紀54歲，每次化妝都被化妝師、造型師團隊不停係咁噴，再逐條逐條將頭髮畫白。由於監製想於劇集播出前盡量保密「老妝」造型，畀觀眾一個驚喜，梁小冰都諗盡方法去拒絕拍攝期間演員嘅合照要求。今次係梁小冰相隔26年再拍TVB劇集，亦與陳嘉輝夫妻檔演出；梁小冰透露當初被監製邀請演出時，自己係一口答應，全因被劇本感動及覺得角色夠高難度，又為咗以最佳狀態重返熒幕而減肥，由最高峰132磅減到拍攝期間嘅116磅。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！