近30年《獎門人》系列節目即將劃上句號 「獎老」麥美恩林秀怡林正峰親證停播消息

「獎門人」曾志偉於近日錄影的TVB節目《獎門人Hug Hug媽咪感謝祭》上向現場觀眾透露即將錄影最後一集《獎門人》，難道播岀近30年的《獎門人》系列節目要劃上句號？

「獎老」們接受《Yahoo娛樂圈》訪問，林秀怡透露：「應該拍多集就係最後一集喇，好似話休息幾個月，都未知會唔會再有，希望可以再有啦。一切都要睇曾生意見，可能想抖陣。」近年加入「獎老」之列的她說：「做『獎老』好開心，始終都係由細睇到大嘅節目，自己可以成為一份子，覺得好神奇，感恩可以做到獎老。」

同為「獎老」的麥美恩亦很感恩，「每次歡送嘉賓時都係最難忘。我係疫情時加入，從最初大家都要戴口罩玩唔到親密遊戲，又有限聚令唔可以有現場觀眾，到之後要隔開坐，再到𠵱家終於解封晒唔洗戴口罩又可以見到咁多現場觀眾，睇到大家嘅即時反應同互動。」她又說：「呢一季做咗咁多集都Keep住有咁多現場觀眾、家庭觀眾支持，係好難得嘅事。我有少少唔捨得，希望將來繼續用唔同方法同渠道帶歡樂畀大家。」

另一「獎老」林正峰謂：「《獎門人》將會準備錄最後一集，我係好唔捨得，因為呢個好似一個大家庭咁，每次錄影完之後都會一齊去食宵夜同埋檢討，喺獎門人、各位獎老同埋幕後身上學到超多超多寶貴嘅野。我會將喺呢個節目學到嘅嘢好好運用喺唔同嘅節目上面，希望可以畀大家見到我嘅進步同埋唔辜負獎門人台前幕後嘅期望。」他有感而發：「當初一開頭知道自己成為獎門人嘅新獎老時係好開心同激動，因為呢個節目係我由細睇到大，帶咗好多歡樂俾我嘅童年，細細個都有幻想過自己做獎老，冇諗過有一日可以成為獎老，好感恩。其實每次錄節目我都係戰戰兢兢，特別緊張，哈哈，因為好著緊。之後嗰個時段會播啲咩節目我都未知，都係睇公司安排。」

獎門人是TVB自1995年播岀的系列遊戲節目，一眾「獎老」每集會換上造型突出的服裝，並邀請不同藝人擔任嘉賓，希望向現場及家庭觀眾派發笑彈。巴黎奧運將於今夏舉行，未知《獎門人》是否為了讓路給奧運而決定暫停。