香港4大葡國餐廳推介 葡萄牙風味Piri Piri Chicken、上環私房葡國菜

喺香港，葡萄牙菜嘅選擇唔多，以下呢幾間葡國菜正宗又好味，如果想有啲新嘅西餐體驗可以試吓呀。

招牌Piri Piri Chicken Antonio-The King of Piri Piri Chicken

中環Soho區一間葡萄牙小店，格局採用全吧枱座位，適合2-3人去食嘢傾吓偈。最推介就係招牌Piri Piri Chicken，以獨特嘅香料醃製然後烤焗，雞嘅外皮沾滿香料，皮脆肉嫩好惹味，送酒真係一流～另外講到葡萄牙菜又點少得豬扒包，Ribeira Burger麵包鬆軟而有嚼勁，夾住厚切豬扒、迷你脆薯條、粟米、融化嘅cheese同芥末醬汁，而豬扒有肉汁又唔會硬身，好新鮮嘅配搭但出奇地好食。

家庭式風味葡國菜 TUGA 2 Go by Casa do Vasco

老闆好熱情嘅一間家庭式葡國菜餐廳，親切程度好似去咗朋友屋企食飯咁呀。一定要試呢個慢焗八爪魚，原隻八爪魚慢焗得有咬口之餘又夠腍，配菜薯仔索晒啲鮮味好香呀。葡萄牙海鮮飯都值得一試，比起西班牙海鮮飯較多湯汁，成個飯都充滿鮮味又唔太鹹，海鮮都好多同足料。小食的話馬介休、炸鱈魚條都好出色，最後一定要試埋甜品葡撻，酥皮勁脆內餡唔太甜，重會流心，即焗即食真係無得輸～

性價比高正宗之選 Majestic Lisboa

由踏入大門開始已經滿滿葡國色彩，牆上掛滿畫作同華麗吊燈，好有風味。Piri-Piri Shrimp香濃惹味；Bolhao Pato Mussels係用白酒、牛油烹調而成，味道簡簡單單更能凸顯青口鮮味，每一粒都細嫩飽滿，兩者用埋自家製麵包沾醬汁食真係一絕。葡葡牙傳統烤沙甸魚都唔錯，連埋魚肚烤，魚鮮味好濃郁，但一啲都唔腥。另外葡萄牙海鮮飯、Piri-Piri Chicken同埋烤乳豬都做得唔錯，啱晒一大班朋友gathering或慶生。

葡萄牙籍老闆家傳食譜 葡匯咪走雞葡國餐廳

由葡萄牙籍老闆兼大廚主理，一直都用家傳食譜去炮製正宗葡國菜畀大家～招牌烤乳豬皮脆肉厚，中間一層薄薄嘅油脂，配埋嘅炒飯都好好食，加入茄汁一齊炒，入口微酸醒胃，而臘腸令到成個飯更香，提子粒粒則中和返油膩感同增添口感。砵酒燴牛尾味道濃厚，牛尾炆得夠軟又唔會散晒。另外爆芝馬介休球大大粒，同朋友share食會更啱，最後甜品要試吓葡式西多士，帶香濃蛋味同淡淡肉桂香㗎。

文：Yanica
編：Cathy