楊紫瓊承認因未能生育而與潘迪生離婚 仍慶幸做對決定

去年成為奧斯卡影后嘅楊紫瓊，早前為荷里活女星桂莉芙柏德露（Gwyneth Paltrow）嘅Podcast節目做嘉賓，罕有地談到早年喺香港發展時，與富商潘迪生維持3年幾嘅婚姻，更大爆原來係因為生育問題而導致二人分開。

楊紫瓊透露，自己喜歡小朋友，而潘迪生都想擁有大家庭，唔止生一個咁少，更希望有子嗣打理生意王國。但婚後楊紫瓊試過唔同方式嘗試受孕，結果都未能成功，即使互相深愛但都決定離婚。楊紫瓊直認，呢段婚姻冇小朋友令佢難過，不過認為分開係明智嘅決定，至少大家冇假裝問題有日會解決，浪費彼此時間。生育問題以外，楊紫瓊認為做藝人經常周圍飛，要兼顧幕前工作同家庭生活難以平衡，呢個亦係選擇分開嘅原因。

楊紫瓊同潘迪生分開後，雙方仍然保持友好關係，甚至同潘迪生前妻楊敏德、潘同前妻所生女兒潘楚穎係好朋友。

生於馬來西亞嘅楊紫瓊，1983年參加大馬選美後獲邀到香港發展。曾受舞蹈訓練嘅楊紫瓊行「打女」路線，並獲當時冒起嘅得寶電影公司老闆潘迪生賞識。後來楊紫瓊同出身名門嘅潘迪生，由工作伙伴成為情侶，並於1988年結婚。楊紫瓊於事業如日方中時嫁入豪門，並順從潘迪生意願而息影，專注家庭。但「少奶奶」生活對楊紫瓊而言並不如外界想像。多年後楊紫瓊喺訪問承認，相夫教子唔係自己嘅「真身」。由於價值觀唔同，楊紫瓊同潘迪生最終喺1992年離婚。

離婚後楊紫瓊接拍成龍嘅《警察故事3超級警察》復出，到1997年獲邀前往荷里活發展，接拍《新鐵金剛之明日帝國》，成為首位亞裔邦女郎。而潘迪生就喺同楊紫瓊離婚同年，迎娶出身富裕嘅余桂珠，婚後二人育有4名子女，大仔潘冠達喺2018年成為迪生創建執董。

楊紫瓊離婚後有過數段感情，2004年Michelle喺一個晚宴上認識比自己年長16歲嘅前法拉利車廠總裁Jean Todt，當晚Jean就向Michelle跪地示愛，搞到好尷尬。之後Jean再同楊紫瓊交換聯絡，亦強調可以慢慢發展，令楊留下深刻印象，多次見面後決定交往，而Jean亦十分支持楊紫瓊有自己事業。二人拍拖近20年後，去年夏天於瑞士日內瓦舉行婚禮。而今年初Jean 嘅兒子添丁，令楊紫瓊升呢成為嫲嫲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！