梁詠琪台北演唱會舞台花海效果出事 網民驚呼：奠儀放哪裡

曾經出過國語碟嘅梁詠琪，當年喺台灣相當受歡迎，早前Gigi首次喺台北小巨蛋舉行演唱會，吸引唔少樂迷捧場。

不過演唱會其中一個部份，舞台上升起一個小山坡，以投映技術形造大自然風景，Gigi穿上白色雪紡裙唱出曲風清新嘅《新鮮》，聽落冇咩問題。但係背後大屏幕映出一片花海，Gigi唱歌畫面喺屏幕中央出現，咁就出事嘞。

呢個場面被post上facebook後，有台灣網民留言話，佢前幾日參加外婆嘅告別式，畫面同Gigi演唱會呢一幕「100％一樣」，連台灣殯葬達人都留言話「後勁實在是太強了」。其他網民都留言抽水「奠儀放哪裡」、「感覺好莊嚴」、「好險前方沒有擺桌子」。

去年初梁詠琪舉行紅館個唱，商台DJ梁文禮都係座上客，佢仲出咗個限時動態大讚Gigi好靚。不過有網民搵到疑似阿禮喺私人facebook，用同一張相發文講咗另一番說話，狠批Gigi演唱會由編排、編曲、舞蹈以至服裝都一無是處，仲大鬧Gigi唱得差。事後梁文禮向Gigi道歉，商台就宣布阿禮停工三個月「待冷靜反思過後再重新出發」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！