李佳芯回應被《福祿壽訓練學院》李思捷惡搞「被雪藏」及「被打格」 讚TVB開明

TVB即將開拍電視劇《麻雀樂園》，喺噚日（16日）男女主角李佳芯（Ali）、譚俊彥及一眾劇中演員齊齊出席拜神儀式。喺上星期李思捷喺真人騷《福祿壽訓練學院》中模仿Ali喺劇集《智能愛人》角色「智能人」阿寶，不但將劇名改成《智能雪人》，更出言狂寸Ali及重演換衫被打格仔一幕，以影射李佳芯被內地平台打格仔一事，而Ali喺接受訪問時亦有就事件回應。

電視劇《麻雀樂園》喺噚日進行拜神儀式，同時亦係劇中演員首次公開劇中造型。女主角李佳芯就話監製形容佢嘅角色係一個女漢子，既溫柔又剛強，而佢同譚俊彥嘅角色係由細識到大，所以關係好close。咁佢哋二人角色嘅發展空間，Ali就大賣關子話好close但最後會唔發展更加多，要等觀眾到時自己睇。

上星期播出嘅TVB扮嘢真人騷《福祿壽訓練學院》，李思捷模仿Ali喺《智能愛人》中飾演嘅阿寶，更出言狂寸李佳芯：「啱啱先由個雪柜行出嚟，所以我覺得有啲凍」，又重演換衫被打格仔一幕，以影射李佳芯被內地平台打格仔一事。而Ali喺接受訪問時就話有聽聞，不過佢自己就冇睇，同埋「自己公司做返證明都幾開明呀，咁都幾得意嘅」。至於模仿換衫情節，Ali就話劇情上佢都有打格仔，李思捷只係食返呢樣。另外，佢仲話有一日唔知係咪拍攝，李思捷見到佢嗰陣時有口難言。而依家佢終於明白，原來玩緊一個咁樣嘅主題。

另外，對於早前到職訓局分享後慘被P走，Ali亦大方表示回應：「嗰一次我就去一個戲劇上嘅分享，之後我都冇理咁多就繼續工作，每個部門都有自己處理方法，我自己就不去評論。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！