4大日式鐵板燒餐廳推介 $98午市速食鐵板燒、尖沙咀鐵板燒廚師發辦

日式鐵板燒除咗可以食盡新鮮食材，重可以現場欣賞埋師傅如何炮製，難怪咁多人鍾意食～今期介紹幾間日式鐵板燒餐廳畀大家，有精緻嘅，亦有走速食路線嘅，最平午市$98就食到，快啲睇吓邊間啱食！

高級精緻鐵板燒廚師發辦 十四代鐵板燒

呢間新開嘅鐵板燒餐廳主打高級精緻鐵板燒廚師發辦，結合日式烹飪手法同廚師發辦模式，堅持使用時令食材，如A5宮崎和牛、北海道海膽等，為食客呈現最頂級嘅板前現場料理。必試有海膽三文魚子手卷，鮮甜嘅北海道海膽、鹹香嘅醬油漬三文魚子配上米飯同海苔香氣，一啖入口真係好滿足～A4宮崎和牛脂肪紋理豐富，充滿油香；美國薄燒牛肉經過快速高溫燒烤，帶炭香之餘，肉質嫩滑多汁，包埋炸蒜片同香蔥食更惹味𠻹～

$98午市超值套餐 MKT - Mong Kok Teppanyaki

相唔相信$98可以食到一個鐵板燒套餐？旺角花園街呢間餐廳就做到喇！佢係一間日式鐵板燒×台式甜品茶飲嘅餐廳，平日午市$98速食鐵板套餐有5個course，包括比目魚、大蝦、美國牛肉薄燒、漬物同白飯；比目魚外脆內香軟，大蝦爽口彈牙，配埋蝦膏醬就更香口，加$10重可以轉炒飯，呢個價錢同質素真係無得投訴呀。而$198日式鐵板套餐一樣咁抵食，包括大蝦、帶子、美國牛肉薄燒等9款料理，套餐包埋熱門茶飲，例如芒椰小丸子、檸檬寒天青茶同草莓の奶。

日本居酒屋風格 大金酒場

想搵間有風味啲嘅，觀塘呢間日本居酒屋融合咗懷舊元素，如和風燈籠、霓虹招牌同舊式海報，營造出濃厚嘅日本居酒屋氛圍；餐廳更劃分唔同區域，包括壽司、串燒吧台同獨立鐵板燒包廂。金磗二人前套餐就有刺身五款、澳洲龍蝦、澳洲鮑魚同鍋燒比目魚；另外可以根據個人喜好選擇唔同肉類，日本豚肉薄燒嫩滑有口感，日本A5薄燒牛肉則入口即溶，啖啖都令人咁享受呀。

鐵板燒套餐買一送一 赤の匠

主打鐵板燒及壽司廚師發辦～主廚莊師傅同團隊嚴選各地新鮮食材，而家品味饌嚐鐵板燒午餐同晚餐都做緊買一送一優惠，好抵食呀。品味饌嚐鐵板燒晚餐首先有3款前菜，吉列大蝦伴海膽他他醬好鮮味；燒物香草海鹽焗馬友魚鹹香又食到魚味。而南非活鮑魚、海螺伴鮑魚肝醬同龍蝦卷2款伴自家製龍蝦汁鮮味十足；澳洲M4和牛柳厚燒真係油份適中又有香濃肉味；最後食埋經典自家製蕨餅真係完美～

文：Yanica
編：Cathy