戴耀明努力健身有成果 與《一拳超人》埼玉更加似樣

香港藝人同卡通人物撞樣都唔係咩新鮮事，除咗經典嘅鄧梓峰同巴斯光年及元華同吉他他老伯之外，TVB金牌綠葉戴耀明亦同《一拳超人》主角埼玉激似樣，幾年前「神還原」角色深入民心。近日佢喺社交網站上載裸露上半身大騷手臂線條嘅照片，現時嘅鋼條身型令佢同埼玉更加似。

現年51歲嘅戴耀明參與過無數嘅TVB劇集，幾年前獲邀扮演過《一拳超人》嘅主角埼玉而爆紅。近日佢喺社交網站突然上載裸露上半身大騷手臂線條嘅照片，大展健身效果嘅同時亦為自己打氣，留言話：「大叔，努力吧，不能放棄，加油」 。戴耀明一身鋼條身型，除咗令網民眼前一亮之外，仲令佢同《一拳超人》主角埼玉更加似樣。

喺接受訪問時，戴耀明就話佢不時喺網上睇到殘障人士健身嘅影片，令佢深受感動，所以令佢展開健身嘅契機，希望可以喺51歲迎嚟新嘅改變。而佢就係喺上年年底拍攝《巾幗梟雄之懸崖》時開始健身；同時佢仲話好期待有一日可以出現「荷李活」嘅《一拳超人》。雖然佢知道目標好遠，不過只要嘗試向目標進發，過程都係好值得回憶。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！