【十三短打】姜濤話齋：期待見到美斯碧咸

【Now Sports】「期待見到美斯同碧咸兩位國際巨星。」呢句話唔係我講，係姜濤喺噚晚開完Mirror壓軸演場會後講嘅。球王來襲 Now Player全程直擊
港聯VS國際邁阿密
https://bit.ly/48PySLk

國際邁阿密今日喺大球場對港聯，姜濤同Anson Lo係其中賽前音樂表演嘅嘉賓。記者噚晚問姜濤愛好籃球唔係足球喎，姜B就答「體育精神無分種類」。係嘅，莫講話體育迷，就算唔係都一定識美斯同碧咸，而美斯率隊友現身大球場，絕對係城中大事，氣氛肯定熾熱。

波飛太貴唔入場？就算隔住電視機睇巨星風采，斷估都係呢個星期日下畫最佳節目啩？

除咗場外嘅班主碧咸、場內嘅球王美斯、「咬人蘇」蘇亞雷斯等球壇巨星，我哋sports.now.com噚日已經喺《一文睇晒國密4子以外猛將》介紹隊波人腳。美斯噚日訓練時僅僅喺場邊拉筋同接受治療，怕佢出場時間唔多？喂，國密都有好多個國腳級人馬，陣容絕對唔弱，至於港聯亦雲集本港球壇英才，都係有睇頭。

下次美斯再臨香港係幾時？冇人知，話唔定係球員生涯最後一次。點講又係有今生，冇來世，非睇不可嘅盛事。

撰文：球十三
足球迷叫第十二人，冇偏愛，冷眼旁觀係十三。